जनकपुरधाम । नेपाल रेल्वे कम्पनी लिमिटेडले आसन्न प्रतिनिधिसभा सदस्य निर्वाचनलाई लक्षित गर्दै जनकपुर–जयनगर खण्डमा सञ्चालन हुँदै आएको रेल सेवा तीन दिनका लागि पूर्ण रूपमा बन्द गर्ने जनाएको छ ।
कम्पनीको केन्द्रीय कार्यालयले जारी गरेको सूचना अनुसार २१ फागुनमा हुने प्रतिनिधिसभा सदस्य निर्वाचनका अवसरमा शान्ति–सुरक्षा प्रत्याभूति गर्ने उद्देश्यले १९ फागुनदेखि २१ फागुन (बिहीबार) सम्म भंगाहा–जनकपुर–जयनगर खण्डमा सञ्चालित रेल सेवा बन्द रहनेछ । साथै, २२ फागुन (शुक्रबार) देखि साविक बमोजिम नियमित रेल सेवा सञ्चालनमा आउने सूचनामा उल्लेख गरिएको छ ।
यसैबीच, प्रतिनिधि सभा सदस्य निर्वाचनलाई स्वतन्त्र, स्वच्छ र शान्तिपूर्ण वातावरणमा सम्पन्न गराउने उद्देश्यले धनुषाका भारतसँग जोडिएका सबै सीमा नाका तीन दिनका लागि बन्द गरिने भएको छ ।
जिल्ला प्रशासन कार्यालय धनुषाले जारी गरेको सूचना अनुसार निर्वाचनलाई लक्षित गर्दै १८ देखि २१ प्mागुन राति १२ बजेसम्म जिल्लाका सम्पूर्ण सीमा नाका बन्द रहनेछन् ।
मतदान अवधिभर आवतजावतमा नियन्त्रण गर्दै सुरक्षा व्यवस्था प्रभावकारी बनाउन सीमा बन्द गर्ने निर्णय गरिएको प्रशासनले जनाएको छ । अत्यावश्यक सेवाबाहेक सीमा पार आवागमन पूर्ण रूपमा रोक लगाइने जनाइएको छ ।
निर्वाचन प्रक्रिया भयरहित र निष्पक्ष बनाउन सुरक्षा निकायसँग समन्वय गरी सीमा क्षेत्रमा निगरानी कडा पारिने सूचनामा उल्लेख छ ।
प्रशासनले सर्वसाधारण, व्यवसायी तथा सरोकारवालालाई सो अवधिमा यात्रा र ढुवानी व्यवस्थापनका लागि अग्रिम तयारी गर्न आग्रह गरेको छ ।
सहायक प्रमुख जिल्ला अधिकारी उमेश कुमार दाहालद्वारा हस्ताक्षरित सूचनामा निर्वाचन अवधिभर शान्ति–सुरक्षा कायम राख्न सबै पक्षको सहयोग आवश्यक रहेको उल्लेख गरिएको छ ।
सम्बन्धित खबर
